2 preso sa BJMP Iloilo nagbigti

ILOILO CITY – Dalawang magkasunod na kaso ng suicide ang naitala sa Bureau of Jail Management and Penology (BJMP)-City District Jail sa Ungka, Jaro, Iloilo City.

Ang mga biktima ay parehong natagpuang patay makaraan magbigti sa loob ng comfort room.

Kasunod nito, nagsagawa ng imbestigasyon ang BJMP Regional Office at depresyon ang pinaniniwalaang dahilan ng dalawang magkasunod na kaso.

Ang unang biktima na si Christian Buivan, 24, ng Gustilo, Lapaz, Iloilo City, ay sinasabing depress sa kanyang pagkakasangkot sa illegal na droga na nagdulot ng problema sa kanyang pamilya.

Ganito rin ang pangalawang biktima na si Lenen Jerge Savalosa, 28, ng Lopez-Jaena, Jaro, Iloilo City na may kaso rin kaugnay sa illegal drugs.

Ayon kay Jail Senior Insp. Jimmy Britanico, pinuno ng Investigation and Prosecution Division ng BJMP Reg. 6, bagama’t may na-recover na suicide note ay magsasagawa pa rin sila ng imbestigasyon kung may foul play sa insidente.