Massage therapist arestado sa rape  

ARESTADO sa kasong panggagahasa ang isang 22-anyos massage therapist sa bahay ng kanyang kamag-anak kamakalawa ng hapon sa Sampaloc, Maynila.

Ayon kay Supt. Mannan Muraip, station commander ng MPD-PS 4, nakatakdang i-turn-over sa Regional Trial Court ng Ligao, Albay ang suspek na si Maximino Prollamante,  residente ng Binanowan, Ligao City.

Naaresto ang suspek sa bisa ng warrant of arrest na ipinalabas ni Judge Ignacio Barcillano Jr. ng  Regional Trial Court Branch 13, 5th Judicial Region ng Ligao City, Albay para sa dalawang counts ng rape at paglabag sa Sec. 5 (b) ng Republic Act 7610 (Child Abuse).

Nauna rito, nakatanggap ng impormasyon ang pulisya na nagtatago sa bahay ng kanyang kamag-anak ang suspek sa Simoun St., Sampaloc, Maynila.

Dakong 12:50 p.m. nang maaresto ng mga pulis sa pangunguna ni Insp. Jerry Bravo, ang suspek habang nakatambay sa panulukan ng Maceda St. at Makiling St., Sampaloc, Maynila.

Ang nasabing kaso ay isinampa sa suspek noong nakalipas na taon sa Albay.

Leonard Basilio