Dalagita sinaktan, inihulog sa hagdan ng sariling ama (Dahil sa pagpapaligaw)

BAGUIO CITY – Nilalapatan ng lunas sa ospital ang isang dalagita makaraan saktan ng sarili niyang ama sa inuupahan nilang bahay sa Pico, La Trinidad, Benguet kamakalawa.

Ayon sa kapatid ng biktima, nakikipag-inoman ang kanilang ama nang komprontahin ang 16-anyos biktima hinggil sa pagpapaligaw.

Hindi umimik ang biktima na ikinagalit ng kanilang ama kaya pinagpapalo siya ng walis at sinuntok sa tiyan.

Hindi pa nakontento ang kanilang ama, kaya itinulak sa hagdan ang biktima hanggang mahulog at mabagok ang ulo sa sahig.

Agad nagpatulong ang mga kapatid ng biktima sa mga concerned citizen at pinigil ang suspek habang isinugod sa pagamutan ang dalagita.

Nakapiit sa safekeeping cell ng La Trinidad Municipal Police Station ang suspek. (HNT)