Tinabla si PNoy ng mga Obrero

NGAYONG araw ginugunita ang Labor Day. 

Taon-taon, sa tuwing sasapit ang May 1, kaliwa’t kanang kilos-protesta ang inilulunsad ng iba’t ibang grupo ng mga manggagawa na  kalimitan ay makikitang nagtitipon-tipon sa paanan ng Mendiola Bridge.

Bukod sa paulit-ulit na hinaing ng mga manggagawa, ang usapin sa contractualization ang higit na tumatampok nga-yon dahil sa lupit na idinudulot nito sa mga namamasukan sa pabrika.

Ang contractualization ang dahilan kung bakit hindi maaaring maging regular employee ang isang manggagawa.

Limang buwan lang ang maaaring itagal ng isang obrero at pagkatapos nito maaari na siyang tanggalin sa kanyang trabaho. Ang sikat na katawagan dito ay ‘endo’ o end of contract.

Kaya nga, nagpasya na ang NAGKAISA,  alyansa ng mga manggagawa na i-boycott ang taunang luncheon meeting kay Pangulong Aquino na magaganap sana ngayong araw sa Malacañang.

Sa halos tatlong taon pakikipagpulong ng NAGKAISA kay Pnoy, bigo ang pangulo na  i-certify bilang urgrent ang Security of  Tenure bill na sasagot sa ipi-natutupad na sistemang contractualization sa mga pagawaan.

Nakapanghihinayang,  sa paggunita ng Araw ng Paggawa, walang kakapit-bisig ngayon si Pnoy na mga manggagawa.