Sari-sari store inararo ng jeep, 4 sugatan

NAGA CITY – Sugatan ang apat katao kabilang ang dalawang menor de edad, makaraan araruhin ng pampasaherong jeep ang isang tindahan sa Brgy. Luklukan Sur, Jose Panganiban, Camarines Norte kamakalawa.

Nabatid na binabaybay ng jeep na minamaneho ni Jimmy Daria ang kahabaan ng nasabing lugar nang mawalan ito ng preno.

Bunsod nito, hindi nagawang iwasan ni Daria ang sari-sari store na pag-aari ng biktimang si Emma Andaya, 38-anyos.

Sa lakas ng pagsalpok ng jeep sa tindahan, nasugatan si Andaya at ang kanyang tinderang si Reynaldo Baroso, 14-anyos, gayondin ang pasahero ng jeep na sina Princess Wayeth, 9, at Elena Bataler, 56-anyos.

Agad isinugod sa ospital ang mga biktima habang sumuko sa mga pulis ang driver ng jeep.