Bike rider todas sa trailer truck

SABOG ang ulo at bali-bali ang buto ng isang bike rider makaraan mabundol nang humahagibis na trailer truck kamakalawa ng hapon sa Navotas City.

Agad binawian ng buhay ang biktimang si Nestor Patria, nasa hustong gulang, residente  ng Alpha St., Brgy. Bangkulasi ng nasabing lungsod, makaraan makaladkad ng ilang metro at una ang ulong bumagsak sa sementadong kalsada.

Habang kusang-loob na sumuko ang suspek na si Sonny Boy Lanohan, 38, ng Brgy. Cabayaoasan, Paniqui, Tarlac, driver ng trailer truck (TXE-610), nahaharap sa kasong reckless imprudence resulting in homicide.

Batay sa ulat ni PO3 Tristan De Lara, traffic investigator, dakong 3:40 p.m. nang maganap ang insidente sa kahabaan ng M. Naval St., Brgy. North Bay Boulevard South ng lungsod.

Nasa pasalubong na direksyon ang bisekletang sinasakyan ni Patria nang bigla si-yang salpukin nang humahagibis na truck kaya siya tumilapon at nakaladkad na naging dahilan ng kanyang kamatayan.

Rommel Sales