Bomba, sumpak, droga kompiskado sa 3 taong grasa (Sa ‘kuweba’ sa McArthur Bridge)

NAKOMPISKA ng mga tauhan ng Manila Police District (MPD) at DSWD ng City Hall ng Maynila ang bomba, droga at sumpak sa ilalim ng McArthur Bridge sa Lawton, Ermita, Maynila kahapon.

Nakapiit na sa Ermita Police Station 5 ang tatlong suspek na sina Dennis Reyes, 24, ng 1142 Paseo Del Carmen, Quiapo, Maynila; Nestor Umacob, 52, ng 659 Arroceros, Ermita, Maynila, at Jonathan Abantag, 33, ng Block 9, Baseco Compound, Port Area, Maynila.

Ayon kay Supt. Albert Barot, hepe ng Ermita Police Station 5, dakong 8:30 a.m. nang makompiska nina Chief Inspector Elmer P. Oceo at SPO1 Lawrence Dizon ng Plaza Lawton PCP, ang bomba, droga at sumpak sa pinagtataguang kuweba sa ilalim ng McArthur Bridge nang magsagawa ng Oplan Sagip Street Children ang mga awtoridad sa nasabing lugar.

Napag-alaman, pinaputukan ng mga suspek ang mga awtoridad nang pasukin ang nasabing kweba ngunit nasukol ang mga salarin at naaresto.

Sa nasabing operasyon ay dinampot ng mga awtoridad ang sampung kabataan at inilagak muna ng DSWD sa mga bahay-ampunan bago ibabalik sa kanilang mga magulang.

Leonard Basilio