Bebot arestado sa pagbebenta ng fake gold bar

GENERAL SANTOS CITY – Nananatili sa kustodiya ng National Bureau of Investigation (NBI) ang isang babaeng inireklamo ng pagbebenta ng pekeng gold bars makaraan ang isinagawang entrapment operation.

Ayon sa mga biktimang si Divina Sinoy, 49, ng Domolok, Alabel Sarangani Province, at Jolito Sinoy, 56, ng Alegria, Alabel, inalok sila ng suspek na kinilalang si Juanita Bantila ng gold bar sa halagang P40,500.

Dinala aniya sila ng suspek sa Puting Bato, Davao City kung saan nangyari ang bayaran at ibinigay sa kanila ang naturang gold bar.

Pag-uwi sa GenSan ay agad ipinasuri ng mga biktima ang nasabing gold bar upang masigurong ito ay purong ginto, ngunit napag-alamang isa lamang itong tingga na kinulayan ng ginto, kaya’t daling ini-report sa NBI.

Makaraan ang ilang araw ay muli silang inalok ng suspek ng isang golden Buddha at tatlong gold bars sa halagang P100,000, at sa puntong ito itinakda ang entrapment operation laban sa salarin.

Kasalukuyan pang iniimbestigahan ang naturang reklamo habang nananatili sa kustodiya ng NBI ang suspek at ang pekeng gold bar na gagawing ebidensya.