14 taon kulong vs kidnaper ng Bombay (1 pinalaya ng korte)

HINATULAN ng 14 taon pagkabilanggo ng korte ang isang lalaki habang pinalaya ang kanyang kasama bunsod ng kasong tangkang pagdukot at pagpatay sa isang negosyanteng Indian national halos anim taon na ang nakalilipas sa Marikina City.

Sa 31-pahinang desisyon ni Judge Felix P. Reyes ng RTC Branch 272, si Leo Inguito ay hinatulang mabilanggo ng walo hanggang 14 taon, walong buwan at isang araw.

Habang pinalaya si Noel Galano y de las Alas, gumamit ng alyas na Leo Escalera, dahil bigo ang prosekusyon na patunayan sa kasong attempted murder at kidnap for ransom.

Matatandaan, dinukot ng mga armadong lalaki noong Hulyo 20, 2009 sa Diamond St., Concepcion ng nasabing lungsod ang negosyanteng si Mohan Sing Girn na noo’y nangongolekta ng pautang.

Dinala ng mga suspek ang biktima sa Cainta, Rizal ngunit nakatakas at nakahingi ng tulong sa mga awtoridad na nagresulta sa pagkakadakip sa mga salarin.

Ed Moreno