Engineer, misis timbog sa drug ops sa Koronadal (P20-M kita kada buwan)

KORONADAL CITY – Kulong ang isang inhinyero at kanyang asawa makaraan maaresto nang pinagsanib na pwersa ng Koronadal City PNP at City Anti-Drug Abuse Council sa isinagawang drug-buy bust operation sa bahagi ng Corazon St, Brgy. Morales, sa Lungsod ng Koronadal.

Kinilala ang mag-asawang sina Engr. Grace Bermejo Ledesma at Alson Fernandez Ledesma.

Inihayag ni CADAC Action Officer Dr. Glorio Sandig, matagal nang minamanmanan ng mga awtoridad ang nasabing mga suspek bago isinagawa ang operasyon.

Nakuha mula sa mga suspek ang limang malalaking sachet ng shabu na may bigat na 5 gramo bawat isa.

Batay sa mga impormasyon, umaabot sa P5 milyon ang kita ng mag-asawa sa pagbebenta ng droga bawat linggo, ibig sabihin, halos P20 milyon ang kanilang kita sa isang buwan.

Sa ngayon inaalam pa ng mga awtoridad ang kabu-uang halaga ng droga na kanilang nakompiska na ipinadala sa crime laboratory sa General Santos City.

Ayon sa opisyal, nasa top 10 ng drug watchlist ang nasabing mag-asawa.