Bucor Chief gusto na rin mag-resign

KINOMPIRMA ni Pangulong Benigno Aquino III na gusto na rin mag-resign ni retired police general Franklin Bucayu  bilang Bureau of Corrections (BuCor) chief dahil sa dami nang natatanggap na death threats mula sa nabulabog na drug lords sa Bilibid.

Si Bucayu ay pangatlong opisyal na kakalas sa administrasyong Aquino sa loob ng nakalipas na limang araw.

Nauna sa kanya sina resigned Customs Chief John “Sunny” Sevilla at Energy Secretary Jericho Petilla.

Sa panahon ni Bucayu bilang BuCor chief, ilang beses na sinalakay ng National Bureau of Investigationa (NBI) ang mala-hotel room na kuwarto ng VIP drug convicts sa New Bilibid Prisons (NBP) at nakompiska ang milyon-milyong piso, shabu, armas at mga mamahaling gamit.

Noong nakalipas na linggo nama’y ibinunyag ng convicted drug lord na si Ruben Tiu sa NBI na mismong sa NBP galing ang mga drogang ibinebenta niya sa Sablayan Prison and Penal Farm.

Sabi pa ni Tiu na may maliit na shabu laboratory sa loob ng NBP.

Mayroon nang napipisil si Pangulong Aquino na ipapalit kay Bucayu ngunit hindi niya tinukoy ang pagbibitiw.

Rose Novenario