HATAW! D'yaryo ng Bayan hatawtabloid.com
MASAYANG-MASAYA si Tonet Gedang ng Artiste Entertainment dahil naging matagumpay ang movie screening ng Edna sa Adamson University kamakailan.
Natuwa siya dahil sa magagandang komento at feedback ng mga estudyante sa pelikula. Matagumpay niyang naibahagi ang tunay na mensahe ng pelikula na maging “eye opener” sa karamihan lalo na sa kabataan na may OFW parents na bigyang halaga at ma-realize ang hirap at sakripisyo ng mga magulang sa ibang bansa para maibigay sa mga kapamilya ang ginhawa sa buhay.
“Ang ‘Edna’ ay nagpapakita ng tunay na conflict at nangyayari sa tipikal na pamilyang Filipino,” komento ng estudyante. Humanga rin sila sa galing ng pagganap ng mga bida lalo kay Irma Adlawan dahil naipamalas nito ang pagiging may matatag na kalooban at pagkakaroon ng “good values” bilang makabagong Filipina at bayani.
Sa open forum, may nagtanong kay Mr. Geda g kung sadya ba nilang ginawa at ipinakita ang tawag nilang “poverty porn” na trend sa mga indie movie?
“Kung mapapansin n’yo ang pamilya ni Edna ay middle class at hindi mahirap . Mula sa simula, ang adhikain ng movie ay maipakita ang istorya ng pamilyang Filipino hindi lang ng OFW kundi lahat ng pamilya o magulang na nagsasakripisyo para maibigay ang maginhawang buhay sa mga anak,” ani Tonet.
Ang Edna ay magkakaroon ng eksklusibong screening sa Metropolitan Museum (April 28) at Instituto Cervantes de Manila (May 9), UP Los Banos (April 30), at UP Diliman Film Center (May 18). Puwede ring mapanood ang trailer sa http://www.facebook.com/Edna.Film2014. o mgbrowser sa Edna.Film2014.
