PNoy sisikaping sagipin si Veloso sa firing squad  

SISIKAPIN pa rin ni Pangulong Benigno Aquino III na maisalba sa tiyak na kamatayan si Filipina drug convict Mary Jane Veloso kahit itinakda na bukas ang pagbitay sa kanya sa Indonesia.

Ito ang sinabi ng Pangulo sa kanyang departure speech sa NAIA Terminal 2 bago tumulak patungong Kuala Lumpur, Malaysia para dumalo sa 26th ASEAN Summit.

“Sa pagdalo po natin sa ASEAN Summit na ito, kukunin na rin natin ang pagkakataon na ipagpatuloy ang ating pagsisikap upang matulungan ang kababayan nating si Mary Jane Veloso. Doon sisikapin nating kausapin si Pangulong Joko Widodo ng Indonesia upang iapela muli ang kanyang kaso,” aniya.

Makaaasa aniya ang ating mga kababayan sa loob man o labas ng bansa, ginagawa niya ang lahat ng makakaya para ibsan at tugunan ang mga problema ngayon at hindi na ito maipasa sa mga susunod na administrasyon.

Tatlong beses nang umapela ang Pangulo sa Indonesian government para kay Veloso, noong nakalipas na linggo ay lumiham siya kay Widodo upang bigyan ng executive clemency ang Filipina drug convict, bukod pa sa naunang sulat para judicial review.

Bago kay Widodo ay sinulatan din ng Pangulo si noo’y Indonesian President Susilo Bambang Yudhoyono para bigyan si Veloso ng clemency.

Kasama sa naghatid sa Pangulo sa paliparan kahapon si Vice President Jejomar Binay na kababalik lang sa bansa mula sa Indonesia at nabigong isalba si Veloso sa kabila nang apat na beses na pakikipagulong sa Indonesian officials.

Kaugnay nito, inihayag ng Palasyo na P11.8 milyon ang inilaan ng gobyerno para sa ASEAN trip ng Pangulo.

Rose Novenario