Jeepney barker sugatan sa boga ng TV tecnician

SUGATAN ang isang jeepney barker makaraan dalawang beses barilin sa likod ng isang television technician kamakalawa ng gabi sa panulukan ng Raon at Evangelista Streets, Quiapo, Maynila.

Nakaratay sa Jose Reyes Memorial Medical Center ang biktimang si Randy Lim, 28, ng 6 Carcer St., Quiapo, Maynila.

Habang tumakas ang suspek na nakilala lamang sa pangalang George, television technician sa Raon Shopping Center.

Ayon kay PO2 Allan Andrew Mateo, imbestigador ng Manila Police District-Police Station 3, naganap ang insidente dakong 8 p.m. sa nabanggit na lugar.

Ayon sa biktima, bumibili siya ng juice sa nasabing lugar nang makarinig siya ng dalawang putok ng baril. Pagkaraan ay nakaramdam siya ng pananakit ng kanyang likod at nabatid na may tama siya ng bala.

Pagtingin sa likod ng biktima, nakita niyang tumatakbo ang suspek habang armado ng baril patungo sa direksiyon ng Rizal Avenue.

Dagdag ng biktima, kilala niya ang suspek dahil malimit siyang maglaro ng computer games sa nasabing shopping center kung saan nagtatrabaho ang salarin.

Ngunit hindi niya batid kung bakit siya binaril ng suspek. Patuloy ang imbestigasyon ng pulisya sa insidente.

Leonard Basilio