Withdrawals sa Revilla at Corona assets lilinawin

MAGING ang Malacañang ay nagulat sa balita kaugnay sa sinasabing pagkaka-withdraw ng mga naka-freeze na assets sa banko nina Sen. Bong Revilla at dating Chief Justice Renato Corona.

Si Revilla ay kasaluku-yang nakakulong dahil sa kasong plunder na nag-ugat sa pork barrel scam habang si Corona ay na-impeached kaya ‘frozen’ at hindi maa-aring galawin ang kanilang bank deposits.

Dahil sa withrawals, nababahala ang ilang anti-corruption watchdogs na baka makapag-withdraw na rin ng pera si Janet Lim-Napoles at malusutan ang Anti-Money Laundering Council (AMLC).

Sinabi ni Presidential Spokesman Edwin Lacierda, aalamin muna sa mga banko kung kailan nangyari ang withdrawals at kung aling bank accounts ang nagalaw.

Ayon kay Lacierda, kung naganap ang withdrawal pagkatapos mailabas ang freeze order, tiyak na may paglabag at may problema sa monitoring ng mga banko at AMLC.

Una nang lumabas sa report na halos nalimas o naubos na ang bank depo-sits nina Revilla at Corona sa kabila ng freeze order mula sa korte.