HATAW! D'yaryo ng Bayan hatawtabloid.com
PAGKATAPOS gumanap na kagalang-galang na amo bilang si Ser Chief si Richard Yap sa seryeng Be Careful with My Heart, magiging action star naman siya sa Wansapanataym Presents: My Kung Fu Chinito kasama sina Enchong Dee, David Chua, Sofia Andres, at Atoy Co handog ng Dreamscape Entertainment mula sa direksiyon ni Erik Salud.
Malayo na ang imahe ni Richard na mabango at malinis tingnan sa bago niyang papel bilang martial arts expert dahil dito sa bagong serye ay mapapanood na siyang puro pawis at madungis kapag tinuturuan na niya si Enchong.
Kuwento ng tsinitong aktor, “magiging protégée ko si Diego, ituturo ko lahat ng alam ko sa wushu.”
Kailangan daw kasing ipasa ni Richard ang nalalaman niya sa wushu sa taong may magandang puso at si Enchong nga iyon.
Si Steven Seagal na kilala naman bilang mahusay sa Aikido, 7th dan black belt at nagtuturo sa Japan ang idol ni Richard pagdating sa martial arts at marahil kapanahunan niya.
Dahil si Enchong naman ay si Jackie Chan ang idol, si David naman ay si Jet Li, at si Atoy naman ay si Bruce Lee at biniro naman si Sofia na si Cynthia Luster ang peg.
Anyway, naikuwento ni Richard na noong nagsisimula raw siya ay nakatikim siya ng discrimination kapag nag-o-audition dahil mas pinapaboran daw ng casting agency ang mga mestizo looking at hindi type ang maliliit ang mata o tsinito.
“Ako na-experience ko ‘yan kasi usually, puro mga mestizo (hinahanap), ngayon medyo in na ngayon (Chinese) mas accepted na sa market. Advantage na ngayon ang chinito,” nakangiting kuwento ng aktor.
ni Reggee Bonoan
