Chinese natagpuang patay sa pumping station sa Pasay

NATAGPUANG palutang-lutang sa pumping station ng Metropolitan Manila Development Authority (MMDA) ang isang hindi nakilalang lalaking Chinese looking sa Pasay City kahapon ng umaga.

Inilarawan ng pulisya ang biktimang nasa 55 hanggang 60-anyos, maiksi ang buhok, katamtaman ang pangangatawan at nakasuot ng gray polo shirt at itim na pantalon at may lamang P520 ang kanyang pouch.

Base sa imbestigasyon ni SPO3 Joel Landicho, dakong 8:45 a.m. nang matagpuan ng isang Jerold Lee Gaestos ang biktima na palutang-lutang sa MMDA Pumping Station sa panulukan ng Libertad St., at  Roxas Boulevard, Reclamation Area ng naturang lungsod.

Aniya, walang palatandaan na pinatay ang biktima dahil walang nakitang ano mang sugat sa katawan.

Matatandaan, kamakailan ay isang Chinese national ang dinukot ng dalawang hindi nakilalang lalaki sa Makati City.

Ang labi ng biktima ay agad  dinala sa Rizal Funeral Parlor upang isailalim sa autopsy.

Jaja Garcia