Bert Lina ibinalik ni PNoy sa BOC

ITINALAGA ni Pangulong Benigno kahapon si Alberto Lina bilang bagong commissioner ng Bureau of Customs (BOC) kapalit nang nagbitiw na si John Philip (Sunny) Sevilla.

Si Lina , isang certified public accountant (CPA) ay kilalang malapit kay Finance Secretary Cesar Purisina.

Pareho silang miyembro ng Hyatt 10 o ang mga miyembro ng gabinete na kumalas sa administrasyong Arroyo sa kasagsagan ng “Hello Garci” scandal noong 2005.

Nagsilbi si Lina bilang Customs chief ni Pangulong Gloria Macapagal-Arroyo sa loob ng limang buwan hanggang magbitiw para sumama sa Hyatt 10 noong Hulyo 8, 2005.

Sa panahon niya sa BOC ay inilunsad ang kontrobersiyal na Run After Smugglers (RATS) program at inilunsad din ang pinalawig na work hours ng kawanihan mula 7 a.m. hanggang 7 p.m. mula sa dating 8 a.m. hanggang 5 p.m., at naging Lunes hanggang Sabado ang mga araw ng trabaho sa Customs.

Bago napunta sa gobyerno, si Lina ang chairman ng Lina Group of Companies, may-ari ng giant logistics firm na Air21.

 Kamakalawa ng umaga, inianunsiyo ni Sevilla ang kanyang pagbibitiw sa puwesto dahil sa aniya’y political pressure.

Rose Novenario