Sanggol, paslit ini-hostage ng 15-anyos tiyuhin

KALABOSO ang isang 15-anyos binatilyo makaraan i-hostage ang mga pamangkin niyang isang sanggol at paslit habang armado ng patalim kamakalawa ng gabi sa Caloocan City.

Ang suspek na nakatakdang dalhin sa pangangalaga ng Department of Social Walfare Development (DWSD) ay itinago sa pangalang James, ng Camarin ng naturang lungsod.

Batay sa  nakalap na ulat kay acting Caloocan Police chief, Supt. Ferdinand Del Rosario, dakong 5 p.m. nang biglang i-hostage ng suspek na armado ng kutsilyo ang 7-anyos batang lalaki at siyam buwan gulang na sanggol sa bahay ng mga biktima sa San Vicente Ferrer, Camarin ng nasabing lungsod.

Pilit na kinombinsi ng mga kaanak ang suspek na pakawalan ang mga biktima ngunit hindi nakinig kaya napilitan silang tumawag ng pulis.

Makaraan ang ilang oras, hindi pa rin pinapakawalan ng suspek ang kanyang mga pamangkin kaya puwersahang pinasok ng mga pulis ang bahay at inaresto ang binatilyo. 

Ayon sa ina ng mga biktima na pinsan ng suspek, ilang araw na niyang napapansin na balisa ang binatilyo at sinasabing gusto nang umuwi sa kanilang  probinsya ngunit walang pasahe dahilan upang maburyong at ini-hostage ang mga pamangkin.