CA justice pa isinangkot sa ‘Justice for Sale’

ISA pang Court of Appeals (CA) justice ang irereklamo ng grupong Coalition of Filipino Consumers sa Supreme Court (SC) kaugnay ng “justice for sale.”

Sinabi ni Perfecto Jaime Tagalog, secretary general ng Coalition of Filipino Consumers, iba pa ito sa dalawang CA justices na ayon kay Sen. Antonio Trillanes ay sinuhulan ng pamilya Binay upang makakuha ng temporary restraining order (TRO) para sa suspensiyon ni Makati Mayor Junjun Binay.

Gayonman, tumanggi muna si Tagalog na pangalanan ang tinutukoy na CA justice, maging ang kanyang source.

Ngunit pagtitiyak niya patungkol sa source, “Ito po’y galing mismo sa aktibong justice na kasama rin po nila na nangangamba at nababahala po sa kalakaran ng ating hudikatura.”

“‘Yung una nating requirement sa kanya noong siya po ay humingi ng tulong at lumapit sa Coalition of Filipino Consumers na dapat siya ay tatayuan at maninindigan dito sa mga alegasyon na binigay niya.”

Sumulat na aniya sila kay Chief Justice Maria Lourdes Sereno para ihirit na pangunahan ang imbestigasyon bagama’t kailangan muna nilang maghain ng kaso sa Korte Suprema bago aralin ng punong mahistrado.

Banggit ni Tagalog, inaayos na ng kanilang mga abogado ang ihahaing kaso.