HATAW! D'yaryo ng Bayan hatawtabloid.com
ni ROLDAN CASTRO
TINANONG namin si Pokwang kung tatanggapin ba niya na siya na ang bagongKapamilya Comedy Queen ngayong napapabalitang pipirma na sa GMA 7 si Ai Ai delas Alas?
Umiwas siya sa tanong sa presscon ng bago niyang teleserye na Nathaniel na kasama sina Marco Masa, Gerald Anderson, Shaina Magdayao, Sharlene San Pedro, Jairus Aquino, at Coney Reyes. Magsisimula ito sa Lunes, Abril 26.
“Napakaganda po talaga ng ‘Nathaniel’. Para po ito sa lahat, sa buong pamilya lalong-lalo na sa mga kabataan.
“Hindi, blessed lang ako kasi napasama ako sa isang proyekto na kapupulutan ng aral ng lahat ng mga manonood. Very excited kaming lahat sa proyektong ito.
“And masaya ako dahil ‘yung character ko rito ay hindi lang puro kadramahan pero kasi balance, comedy and drama, ganoon. ‘Yun basta masaya,” sambit niya.
Biniro ulit namin siya sa may elevator na siya na talaga ang Reyna ng Komedya ng Dos.”Roldan, tigilan mo ako,” tumatawa niyang pahayag.
Pero siyempre, bago tuluyang iluklok na Comedy Queen si Pokie, dapat bumalik siya sa mga comedy show ng Dos gaya ng Banana Split: Extra Scoop, Banana Nite o magkaroon ng sitcom gaya ng Home Sweetie Home.
Pasok!
