Waste materials mula Taiwan itinatambak sa Ilocos Port

LAOAG CITY – Iniimbestigahan na ng pamahalaang panlalawigan ng Ilocos Norte ang waste materials na itinatambak sa isang port sa pagitan ng bayan ng Currimao at Badoc na sinasabing inaangkat ng isang kompanya mula sa Taiwan.

Nangangamba ang mga residente sa mga nasabing bayan na maaaring kontaminado ang naturang waste materials at posibleng magdulot nang masamang epekto sa kalusugan ng tao at sa kapaligiran.

Nabatid na ang layunin ng kompanyang Omnico sa pag-angkat nito ng waste materials mula sa Taiwan ay upang palawakin ang port.

Ayon kay Atty. Hermie Labayug, chairman ng Provincial Quarry Council, dahil dito kaya pansamantalang ipinatigil ang operasyon ng Omnico.

Aniya, mapahihintulutan din ang pagtuloy-tuloy ng operasyon ng kompanya kapag napatunayan ng Environmental Management Bureau na hindi ito magdudulot ng ano mang masamang epekto.