Call center agent tumalon mula 4/f, patay

BAGUIO CITY – Hindi na umabot nang buhay sa pagamutan ang isang 33-anyos babaeng call center agent makaraan tumalon mula sa ika-apat na palapag ng library building ng Saint Louis University sa Lungsod ng Baguio kamakalawa ng gabi.

Ang hindi pa pinangalanang biktima ay 33-anyos, nagtapos ng kursong Education sa nasabing unibersidad, at nagtatrabaho bilang call center agent sa City of Pines.

Ayon sa mga awtoridad, maaaring sinadya ng biktima ang magpakamatay base sa mga mensahe sa kanyang cellphone.

Napag-alaman, bago ang insidente, pumasok siya sa library dakong 3 p.m. at hinintay na umalis ang iba pang mga estudyante roon.

Naghintay siya sa loob ng comfort room ng ika-apat na palapag ng gusali at nagkaroon sila ng palitan ng mensahe ng kaibigan niyang babae, sa huling mensahe ay ipinagkatiwala niya ang lahat ng kanyang kagamitan.

Napag-alaman, na-diagnose na may bipolar mental problem noong nakaraang taon ang biktima at laging nade-depress dahil sa problema sa pamilya.

Patuloy ang imbestigasyon ng mga awtoridad  sa insidente.