Misis itinurong utak sa pagpatay sa ex-husband na seaman

BUTUAN CITY – Patuloy ang imbestigasyon ng pulisya kaugnay sa pamamaril kamakalawa ng gabi sa isang seaman na taga-Davao City na nagsadya lang sa Lungsod ng Butuan upang daluhan ang pagdinig ng annulment petition ng kanyang nakahiwalayang misis.

Tinamaan ng mga bala sa iba’t ibang bahagi ng katawan ang biktimang si Rafael Tiongson Suyko Jr., 42, residente ng San Juan Village, Bangkal, Davao City

Ayon kay SPO4 Wilson Ejos Jr. ng Butuan City Police Station 2, itinuturong primary suspect ang misis base sa naunang pahayag ng biktima.

Dagdag ng opisyal, galing sa bahay ng kanyang misis ang biktima dahil binisita niya ang kanilang mga anak at pagdating sa labas ng kanyang inuupahang suite, habang nasa loob pa ng sasakyan ay dito siya pinagbabaril ng riding-in-tandem.

Naganap ito dakong 8:45 p.m. sa Rosewood Subdivision, Brgy. Villakananga sa Butuan City.

Narekober sa crime scene ang siyam na empty shells ng .45 kalibreng pistola.