Date-rape drug lab sinalakay (Sa Mandaluyong)

SINALAKAY ng mga awtoridad ang dalawang condo unit sa Mandaluyong City na hinihinalang pagawaan ng ilegal na droga.

Tumambad sa National Bureau of Investigation (NBI) ang iba’t ibang uri ng droga at paraphernalia.

Natagpuan din ng mga awtoridad sa isa sa mga unit ang sinasabing kitchen laboratory ng date rape drug na Gamma Hydroxybutyrate (GHB).

Ayon sa NBI, ang naturang droga na mas kilala bilang “liquid ecstasy” ay karaniwang inihahalo sa inomin ng isang babae upang mawalan ng malay at magawang halayin. 

Isang patak lamang anila nito ay sapat na upang mawalan ng ulirat ang biktima. 

Bukod sa pagkahilo at pagkahimatay, mayroon na rin anilang namatay dahil sa delikadong chemical reaction ng pinaghalong GHB at alak. 

Nabibili ng P10,000 ang kada 100 ml ng liquid ecstasy, na unang umusbong sa Europa at Amerika. 

Nakapangalan ang condo unit na may kitchen laboratory sa Amerikanong si Aaron Limon. Ang katabing unit ay pagmamay-ari ng kababayan niyang si Dennis Thicke Jr., anak ng lider ng isang malaking sindikato sa droga. 

Naabutan ng mga awtoridad sa isa sa mga condo ang isang Nigerian national na lango pa sa droga.

Habang aminado ang misis ni Thicke, isang Filipina model, na dati na silang gumagamit ng droga.

Tinutugis ng mga awtoridad ang mga suspek na hindi naabutan sa pagsalakay. 

Iniimbestigahan na rin ng NBI ang lawak ng bentahan ng liquid ecstasy sa bansa.