Deodorant hinaydyak ng parak

HINARANG ng hinihinalang mga pulis ang isang ten-wheeler truck na naglalaman ng mga produkto ng Unilver Philippines at inabandona ang driver  at pahinante sa lalawigan ng Bulacan.

Ayon sa ulat ni Supt. Fernando Opelanio, hepe ng Manila Police District-Station 8, hatinggabi noong Marso 28 nang maganap ang insidente sa panulukan ng Ramon Magsaysay Blvd. at V. Mapa St., sa Sta. Mesa, Maynila.

Anim na lalaki, nakasuot ng PNP patrol uniforms ang apat, sakay ng puting Toyota Avanza (TVB-847) ang nanutok ng baril makaraan harangin ang 10-wheeler truck na may kargang Rexona products.

Ipinosas ang driver na si Marvin Orcojada, 28, at pahinanteng si Joey Pacao, 30, ng mga suspek na armado ng baril.

Pinababa sila sa truck saka pinasakay sa Avanza  kasama ang tatlong suspek habang ang tatlo ay kinomander ang truck.

Nang sumapit sa isang bayan sa Bulacan, pinababa ang dalawa at tuluyang tinangay ng mga suspek ang truck.

Leonard Basilio