Bagyong Maysak papasok sa PH sa Miyerkoles

BUMILIS nang bahagya ang bagyong Maysak at napanatili ang lakas habang unti-unting lumalapit sa Philippine area of responsibility (PAR).

Ayon sa Pagasa, mula sa dating 15 kilometro bawat oras ay naging 20 kilometro bawat oras na ang usad nito sa direksyon ng pakanluran.

Dahil dito, inaasahang papasok sa PAR ang bagyo sa Miyerkoles Santo at bibigayan ng local name na Chedeng.

Taglay pa rin ng bagyo ang lakas ng hangin na aabot sa 130 kilometro bawat oras malapit sa gitna at may pagbugsong hangin na aabot sa 160 kilometro bawat oras.

Bago magtanghali nitong Linggo ay natukoy ang sentro ng bagyo sa layong 2,810 kilometro sa silangan ng Mindanao.

“This typhoon is still too far to affect any part of the country. It is expected to enter the Philippine Area of Responsibility (PAR) by Wednesday and will be named ‘Chedng’,” ayon sa Pagasa.

Batay sa pagtaya, maaaring tatama sa Luzon o gigilid sa Visayas ang bagyo sa Biyernes Santo o Sabado de Gloria.

Dahil dito, inaasahang magiging maulan ang Luzon at Visayas lalo na weekend ng Semana Santa.