24-anyos todas sa saksak ng kaibigan  

BINAWIAN ng buhay habang nilalapatan ng lunas sa pagamutan ang isang 24-anyos lalaki makaraan saksakin ng kanyang kaibigan kahapon sa Mandaluyong City.

Kinilala ang biktimang si Joel Hizon, nakatira sa 34 Dansalan St., Brgy. Malamig sa lungsod.

Itinuro ng biktima bago nalagutan ng hininga bilang suspek sa pananaksak ang kaibigan na si Reynold Bediasay, 22, alyas Nonoy, tubong Samar, at nakatira sa 171 Sheridan St., Brgy. Buwayang Bato, Mandaluyong.

Sa inisyal na imbestigasyon ng Mandaluyong PNP, dakong 2 p.m. nangyari ang insidente sa Madison Square, ‘di kalayuan sa bahay ng suspek.

Ayon sa ulat ng pulisya, habang nakikipag-inoman ay nagwala ang suspek kaya inawat ng biktima.

Ngunit dahil ayaw magpaawat ay ipinasya ng biktima na ihatid na lamang ang suspek.

Gayonman, nagbunot ng patalim ang suspek at inundayan ng saksak ang biktima.

Naaresto ang papatakas na suspek nang makahingi ng saklolo sa barangay at mga awtoridad ang ilang kaibigan ng biktima.

Ed Moreno