‘Barbie’ sumalang sa witness stand vs Pemberton

SA ikalawang araw ng murder trial ni US Marine Lance Corporal Joseph Scott Pemberton, tumestigo si alyas Barbie, itinuturing na star witness ng prosekusyon.

Akusado si Pemberton sa pagpatay sa transgender na si Jennifer Laude sa Olongapo City noong Oktubre 2014.

Kaugnay nito, kontento ang pamilya Laude sa pagsalang ni Mark Clarence Gelviro alyas Barbie sa witness stand, na itinuro si Pemberton bilang huling nakasama ng kaibigang si Jennifer sa pinasukang Celzone Lodge bago natagpuang patay ang biktima.

Tinapos agad ang pagdinig dahil hindi nakasipot ang ikatlong testigo ng prosekusyon, ang security guard ng hotel na si Jacinto Miraflor dahil sumama ang pakiramdam.

Ipagpapatuloy ang paglilitis sa Abril 13.