Utol ng PBA player tumalon sa 12-ft high, ligtas

CEBU CITY – Nanatili sa sa psychiatric ward ang isang inmate na nag-dive mula sa viewing deck ng Cebu Provincial Detention and Rehabilitation Center (CPDRC) kamakalawa.

Ayon kay Provincial government consultant on jail management, Marco Toral, bagama’t maayos na ang kalagayan ni Joven Poligrates, 37, taga-Poro, isla ng Camotes, nakatatandang kapatid ni Eliud “Eloy” Poligrates ng KIA Carnivals ng Philippine Basketball Association (PBA), kailangan pa rin niya nang masusing monitoring para maiwasang maulit ang insidente.

Dagdag ni Toral, isasailalim si Poligrates sa psychological examination.

Inihayag ni Toral na may psychological problem ang biktima nang mapasok sa nasabing maximum security compound dahil hindi makausap nang maayos.

Nakitaan din siya ng sintomas ng depresyon kaya inilagay sa balkonahe.

Una rito, tumalon si Poligrates mula sa 12 ft high viewing deck ng CPDRC sa quadrangle na sinasayawan ng dancing inmates, ilang minuto makaraan bisitahin ng kanyang asawa.

Suwerteng bumagsak siya sa balikat ng isang inmate sa ibaba ng viewing deck bago tumama ang ulo sa sementadong sahig.

Nabatid na higit isang linggo pa lamang nakukulong si Poligrates sa kasong rape.