Pribatisasyon sa P92-B Coco Levy funds tuloy na  (Pandarambong ni Aquino at Coco Levy MAFIA — KMP)

WALA nang makaaawat sa Palasyo sa pagsasapribado ng coco levy funds na umaabot sa halagang P92-B sa kabila ng akusasyon ng ilang farmers’ group na iskema ito nang pandarambong ng administrasyong Aquino.

Sinabi kahapon ni Communications Secretary Herminio Coloma Jr.,  ayon kay Agricultural Modernization and Food Security Assistant Francis Pangilinan, ikinakasa na ang resolusyon na lilikha sa isang multi-sectoral stakeholders consultative and advisory council na magbabalangkas ng mga patakaran sa pagpapatupad ng pribatisasyon ng coco levy.

Aaprubahan aniya ng Philippine Coconut Authority board ang nasabing resolusyon sa kanilang pagpupulong sa susunod na buwan.

Inihayag din ni Pangilinan na ang isasapribado sa bisa ng dalawang EOs ay “P72-B in cash and an estimated P20-B in assets.”

Nauna rito, binatikos ng Kilusang Magbubukid ng Pilipinas (KMP) at ng Coco Levy Funds Ibalik sa Amin (CLAIM) movement ang Executive Orders 179 at 180 na nilagdaan noong nakalipas na linggo ni Pangulong Benigno Aquino III na nagsasapribado ng coco levy funds, lalo na ang shares sa United Coconut Planters Bank (UCPB), San Miguel Corp (SMC) at Coconut Industry Investment Fund (CIIF) Oil Mill Group.

Ayon sa KMP at CLAIM, isang uri ng pandarambong ang dalawang EOs na inaprubahan sa huling ilang buwan ng administrasyong Aquino at pinaliit nito ang ang tsansa ng maliliit na coconut farmers na makinabang sa coco levy funds.

“Aquino and his coco levy mafia are saving the best for last. Aquino signed the coco levy EOs to fast track the completion of their plunderous scheme and benefit from the billions of pesos of small coconut farmers’ money before their imminent downfall,” ayon kay KMP chairman Rafael Mariano.

Rose Novenario