Holdaper patay sa shootout

PATAY noon din ang isa sa dalawang holdaper makaraan makipagbarilan sa mga operatiba ng Quezon City Police District kahapon.

Sa ulat kay Chief Supt. Joel D. Pagdilao, QCPD Director, kinilala ang napatay na si Ramil Juzgaya alyas Lupin, tubong San Carlos, Pangasinan, at residente ng 1402 Gana Compound, Brgy. Unang Sigaw, Quezon City. 

Sa imbestigasyon ng pulisya, dakong 4:10 a.m. ang biktima na kinilalang si Feliciano Padilla ng Caloocan City, ay nakikipag-usap sa kaibigang si Michael Balanquit sa harap ng Gubat sa Ciudad, EDSA Balintawak, Brgy. Balingasa, Quezon City, dumating si Juzgaya kasama ang isa pang hindi nakilalang lalaki na tumatayong lookout.

Tinutukan ng baril ni Juzgaya si Padilla kasabay nang pagdedeklara ng holdap.

Agad kinuha ng suspek ang P600 ng biktima na nakapatong sa dashboard ng sasakyan saka mabilis na tumakas.

Agad humingi ng tulong ang biktima sa nagpapatrolyang mga pulis ng QCPD Police Station 1.

Hinabol ng mga operatiba ang suspek pero agad napansin ni Juzgaya ang papalapit na mobile car  kaya biglang nagpaputok. Gumanti ang mga operatiba na nagresulta sa pagkamatay ng suspek.

Sa kalagitnaan ng barilan, nakatakas ang kasama ni Juzgaya.

Almar Danguilan