5 Chinese crew, Pinoy ship captain huli sa illegal mining

CAGAYAN DE ORO CITY – Arestado ang limang Chinese nationals at Filipino vessel captain makaraan mahuli habang nagsasagawa ng off-shore sand dredging sa Sitio Nabulod, Brgy. Tagoloan, Misamis Oriental kamakalawa.

Nabatid na pumasok ang barkong MV Seno sa karagatang sakop ng Misamis Oriental at agad nagsagawa ng off-shore sand dredging nang walang kaukulang pahintulot mula sa Department of Environment and Natural Resources (DENR-10).

Inihayag ni chief of police, Senior Insp. Maricris Mulat ng Tagoloan Police Station, kabilang sa kanilang hinuli ang limang Chinese crew kasama ang mismong may-ari nito at ang Filipino vessel captain.

Ayon sa ulat, mayroong ka-transaction ang Chinese nationals na isang coal fired power plant na nakabase sa Misamis Oriental kaya agad silang naglunsad ng test sand dredging sa lugar.

Dahil sa kabiguang makapagpresenta ng mga suspek ng kaukulang mga dokumento ukol sa operasyon, sila ay inaresto at ikinulong sa mini-cell ng Tagoloan Police Station.

Kinompiska ng Philippine Coast Guard at pinipigil sa Gracia port sa nasabing bayan ang MV Seno.

Natuklasan din na dati nang nahuli ang mga suspek kaugnay sa nasabing gawain sa Cagayan Valley at napalayas mula sa lungsod ng Butuan dahil sa black sand mining.

Kasong paglabag ng Section 102 sa Republic Act 7942 o illegal exploration of minerals ang kahaharapin ng mga arestadong mga suspek.