Tauhan ni Marwan nadakip sa checkpoint

ISASAILALIM na sa booking process ang naarestong tauhan ng napatay na Malaysian bomb expert na si Zulkifli bin Hir alyas Marwan, na si Abdul Malik Salik.

Ito’y makaraan maharang si Salik sa police checkpoint sa bayan ng Panaon, Misamis Occidental nitong Sabado ng hapon.

Matatandaan, si Salik ay miyembro ng notorious na Al Khobar terrorist group na responsable sa mga karahasan sa iba’t ibang lugar sa Mindanao.

Ayon kay Chief Supt. Agrimero Cruz ng northern Mindanao police, ang grupo ng nahuling terorista ang nasa likod ng mga pambobomba mula noong 2006, kabilang ang insidente sa Kidapawan, Cotabato province at Digos, Davao del Sur, na ilang sibilyan ang namatay.

Dinakip si Salik sa bisa ng standing warrants of arrest para sa multiple murder, multiple frustrated murder at multiple attempted murder.

Walang naitalang namatay o nasugatan nang arestohin ang tauhan ni Marwan.