2 patay sa away ng 2 bagets group

NAGA CITY – Dalawa ang patay habang isa ang sugatan sa rambolan ng dalawang grupo ng mga kabataan sa harap ng isang resto bar sa Naga City kamakalawa.

Kinilala ang mga namatay na sina Rondel Ryan Sy III, 28, at Nino Estopina, 27, habang patuloy na ginagamot sa ospital si Sylvestre Berina, 24-anyos.

Ayon kay Insp. Rey Alvarez, nagsimula ang gulo ng dalawang grupo makaraan magkaroon ng pagtatalo ang mga biktima at ang kasama nilang babae.

Biglang lumapit ang babae sa mga suspek na sina Antonio Sayson Cano, 28, at Antonio Rentoria Cano, 22, at humingi ng tulong.

Dahil dito, nagalit ang mga biktima at sinabihan ang mga suspek na huwag makikialam sa kanilang problema ngunit hindi nakinig ang mga suspek.

Sa puntong iyon, nagpambuno ang dalawang grupo hanggang maglabas ng patalim ang dalawang suspek at pinagsasaksak ang tatlong biktima.

Mabilis na nagresponde ang mga pulis at naaresto ang dalawang suspek habang agad dinala sa ospital ang mga sugatan ngunit binawian ng buhay ang dalawa sa kanila.