Sosyalerang anak ni Napoles ayaw paaresto  

HINILING ni Jeane Catherine Napoles, anak ng sinasabing pork barrel scam mastermind na si Janet Lim Napoles, sa Court of Tax Appeals (CTA) na huwag ituloy ang paglabas ng warrant of arrest laban sa kanya.

Sa motion for judicial determination of probable cause na inihain ng kanyang mga abogado, nakasaad na ipinatitigil din ng nakababatang Napoles ang proceedings sa kanyang kaso.

Nahaharap ang anak ni Janet Napoles sa two counts ng paglabag sa National Internal Revenue Code at nasa P17 million ang dapat niyang bayarang buwis sa pamahalaan.

Nitong nakaraang linggo, namataan sa Metro Manila ang anak ni Janet, na nakilala dahil sa magarbong pamumuhay sa Estados Unidos na pinaniniwalaang nakuha mula sa kickback ng ina sa pork barrel fund scam.

Ayon sa impormasyong nakalap ng Department of Justice (DoJ), namataan si Jeane sa Pasay habang kumakain sa 5-star hotel kasama ang kanyang ama at iba pang pinaniniwalaang mga kaanak.

Gayonman, bineberipika pa ng DoJ sa Bureau of Immigration.