Vandolph muling naaksidente sa NAIA

LIGTAS ang aktor na si Vandolph Quizon makaraan masangkot muli sa aksidente sa bahagi ng Ninoy Aquino International Airport (NAIA) Terminal 1 nitong Huwebes.

Batay sa impormasyon, sumampa sa center island ang kotse ng 30-year-old actor at nakasagi ng motorsiklo at isang van.

Sinasabing nabutas ang gulong ng sasakyan ni Vandolph kaya napakabig sa kabilang kalsada sa bahagi ng NAIA.

Sa ngayon ay ‘no comment’ pa si Vandolph sa insidente habang bahagyang nasugatan ang driver ng motorsiklo na si Michael Pereira, 40, ng 106 Victory Avenue, Tatalon, Quezon City, na nasagi ng kanyang kotse.

Bukod sa motorsiklo, nasagi rin ni Vandolph ang isang Toyota Hi-Lux, (WTB-519) na minamaneho ni Leonardo Tapino, 48, government employee, ng 1454 Algeciras St., Sampaloc, Manila. 

Matatandaan, Nobyembre 2001 nang makabangga ng F-150 pick-up truck ni Quizon ang isang Isuzu Elf Truck sa Pangasinan.

Namatay sa nasabing insidente ang girlfriend niyang si Desiree “Ishi” Raquiza.  

Si Vandolph ay anak ng celebrity politician na si Alma Moreno at namayapang si Comedy King Dolphy.

Jaja Garcia