Pekeng dentista arestado; ama tiklo sa droga

ARESTADO sa mga awtoridad ang isang babaeng pekeng dentista gayondin ang kanyang ama na nakompiskahan ng illegal na droga sa Bulakan, Bulacan kamakalawa.

Kinilala ang mga naaresto na sina Joy Aica Consul Luciano, alyas Aika M. Luciano, 21, ng Brgy. Sta Ines, Bulakan, Bulacan, at Rolando Luciano.

Nadakip si Aica sa entrapment operation na isinagawa ng mga kagawad ng Provincial Special Operations Group (PSOG), Provincial Public Safety Company-Bulacan, at Bulakan Municipal Police Station sa Bgy. Sta. Ines, Bulakan.

Ang suspek ay matagal nang minamanmanan ng mga awtoridad dahil sa paglabag sa  R.A. 9484 o illegal practice of dentistry.

Nakompiska mula kay Aica ang P1,000 marked money, dalawang Fuji luting cement powder, dalawang Fuji luting cement liquid, mga orthoelastic rubber bands, dalawang basyo ng packaging na puno ng mouth brackets, 17 ortho edgewise brackets, isang dental explorer, dalawang twissors, isang ligature wire, isang ortho wire cutter, isang improvised puller at isang dental  cast.

Napag-alaman, nang dalhin sa barangay hall si Aica para sa kaukulang imbentaryo ng mga ebidensiya, dumating ang kanyang ama at nakialam.

Habang nasa kainitan ang komprontasyon, biglang may nahulog mula sa ama ng suspek at nang damputin ng mga awtoridad ay nabatid na isang sachet ng shabu kaya siya ay inaresto.

Ang mag-amang suspek at ang nakompiskang ebidensiya ay dinala na sa tanggapan ng PSOG sa Camp Alejo Santos sa Malolos City habang nagpapatuloy ang imbestigasyon ng mga awtoridad sa kaso.

Micka Bautista