Pagtalakay sa K-12 Program iniliban ng Supreme Court

INILIBAN ng Supreme Court ang pagtalakay sa petisyon na kumukuwestiyon sa pagpapatupad ng K to 12 Program ng Department of Education (DepEd).

Sa deliberasyon ng Supreme Court En Banc, nagpasya ang mga mahistrado na talakayin na lamang sa susunod na linggo ang petisyon.

Nabatid na si Chief Justice Maria Lourdes Sereno ay bumiyahe para sa isang official mission.

Ang petisyon laban sa K to 12 ay inihain ng Coalition for the Suspension of K to 12, Suspend K to 12 Alliance, at Council of Teachers and Staff of Universities and Colleges in the Philippines o COTESCUP. 

Nais nilang magpalabas ang hukuman ng temporary restraining order na pipigil sa pagpapatupad ng programa dahil sa pangamba na magdudulot ito nang pagkawala ng trabaho ng 80,000 guro at non-teaching personnel sa iba’t ibang mga kolehiyo at unibersidad sa bansa.

Hindi rin anila handa ang bansa sa pagpapatupad ng 12-year basic education cycle na mandato ng K to 12 dahil sa kakulangan ng mga silid aralan, text books at iba pang pasilidad.

Leonard Basilio