P15 umento sa obrero sa Metro (Ipatutupad sa Abril)

TATAAS ng P15 ang arawang sahod ng minimum wage earner sa Metro Manila simula sa Abril.

Ito’y makaraan aprubahan ng Regional Tripartite Wage and Productivity Board-National Capital Region (RTWPB-NCR) ang resolusyong nagtataas ng basic minimum wage at nagpapatuloy sa P15 cost of living allowance, na sinimulang ipatupad noong Enero 2014. 

Ibig sabihin, mula sa kasalukuyang P466 minimum wage kada araw, tataas na ito sa P481.

Ayon kay DoLE Spokesperson Nikon Fameronag, 587,000 minimum wage earners ang makikinabang dito na pawang exempted din sa income tax.

Aniya, ikinonsidera sa desisyon ang pagtaas ng presyo ng mga pangunahing bilihin, at iginiit na dumaan ito sa serye ng public hearings.