8-anyos nene kritikal sa 16-anyos kalaro

LEGAZPI CITY – Nilalapatan ng lunas sa pagamutan ang isang 8-anyos batang babae makaraan aksidenteng mabaril ng 16-anyos kapitbahay sa Brgy. Pangganiran, Pio Duran, Albay kamakalawa.

Kinilala ang biktimang si Erica Maimot y Pedragosa, nasa kritikal pang kondisyon.

Ayon kay Senior Insp. Jonnel Averilla, hepe ng Pio Duran Municipal Police Station, naglalaro ang biktima at ang hindi na pinangalanang menor de edad na suspek nang mangyari ang insidente.

Napag-alaman, inilabas ng suspek ang air gun mula sa kanilang bahay at pabirong itinutok sa kalarong si Erica.

Ngunit aksidenteng naiputok ang air gun malapit sa dibdib ng biktima.

Agad isinugod sa ospital ang bata habang ang suspek ay pansamantalang dinala sa DWSD para masuri ng isang psychologist.

Sa ngayon, hinihintay na lamang ng pamilya ng magkabilang panig ang resulta ng imbestigasyon bago magdesisyon sa kanilang susunod na hakbang kaugnay ng insidente.