6th ID chief ‘di nakalusot sa CA dahil sa Fallen 44

BIGO si 6th Infantry Division Philippine Army commander, Major General Edmundo Pangilinan na makompirma sa makapangyarihang Commission on Appointments (CA).

Magugunitang isa si Pangilinan sa mga nasisi sa imbestigasyon ng Senado kung bakit naantala ang pagresponde ng militar sa mga naiipit sa labanan na mga miyembro ng Special Action Force (SAF) na ikinamatay ng 44 SAF troopers sa Mamasapano, Maguindanao.

Nakalusot si Pangilinan sa committee level ngunit nagisa nang husto ng mga mambabatas kaugnay nang mabagal na pagsaklolo sa SAF troopers.

Mismong si Sen. Alan Peter Cayetano ang nagsulong sa ‘deferment’ ng kompirmasyon ni Pangilinan sa plenaryo hanggang sa susunod na pagbukas ng sesyon dahil maaring may isyu pa aniyang lulutang kaugnay ng Mamasapano operations na maaaring may kinalaman ang heneral.

Samantala, nakalusot sa CA ang 37 pang opisyal ng Sandatahang Lakas makaraan walang nagkwestyon sa kanilang appointments.