IRR sa tax exemption sa mataas na bonus inilabas

INILABAS na ng Bureau of Internal Revenue (BIR) ang implementing rules and regulations (IRR) para sa mas mataas na tax exemption sa 13th month pay at iba pang bonus ng mga manggagawa.

Matatandaan, nilagdaan ni Pangulong Benigno “Noynoy” Aquino III nitong Pebrero ang panukalang batas na nagtataas sa P82,000 ang tax exemption sa mga bonus ng mga empleyado sa mga pribadong kompanya at gobyerno.

Kaugnay nito, ipinaalala ni BIR Commissioner Kim Henares na hindi epektibo ang naturang batas sa mga self-employed, mga talent sa showbiz at kikitain mula sa negosyo.

Para lang aniya ito sa mga may employee-employer relationship at hindi kabilang ang basic salary at iba pang allowance.

Epektibo ito sa 13th month pay at iba pang bonus na matatanggap mula Enero 1 hanggang Disyembre 31 ngayong taon.

Dating P30,000 ang tax exemption ceiling sa mga bonus.