2 MILF officials Malaysian national? (Walang basehan — Palasyo)

WALANG basehan ang akusasyon na Malaysian nationals ang dalawang pinuno ng Moro Islamic Liberation Front (MILF), ayon sa Palasyo.

Ngunit ang pahayag ni Communications Secretary Herminio Coloma Jr. ay ibinase lang sa online news sa panayam kay MILF peace panel chief negotiator Mohagher Iqbal at hindi mula sa opisyal na record ng Department of Foreign Affairs (DFA).

“According to GMA online news’ interview report on Sunday, 15 March, Mr. Iqbal reportedly said that he and Chairman Murad have only Philippine passports. Therefore, the claim cited in former Sec. Alunan’s Facebook post is, according to Mr. Iqbal, “… baseless”, ayon kay Coloma sa e-mail message sa mga mamamahayag sa Palasyo.

Paliwanag niya, sa nakalipas na 17 taon ay kasama na sa peace negotiation sina Iqbal at MILF Chairman Al Haj Murad at ni hindi nakuwestiyon ang kanilang citizenship .

Kinikilala rin aniya ng Kongreso ang lehitimong papel ng dalawang MILF leaders sa peace process sa pag-imbita sa kanila na humarap sa kanilang mga pagdinig.

Nauna rito, ibinulgar ni dating Interior Secretary Rafael Alunan na sina Murad at Iqbal ay kapwa mamamayan ng Malaysia.

Rose Novenario