‘Jumper gang’ member utas sa truck driver

PATAY ang isang miyembro ng “Jumper gang” nang saksakin ng truck driver makaraan batuhin ng biktima ang salamin sa driver’s seat kamakalawa ng gabi sa panulukan ng Quirino Avenue at Osmena St., Paco, Maynila.

Kinilala ni SPO3 Glenzor Vallejo, ng Manila Police District-Homicide Section, ang biktimang si Manuel Yabut, 45, residente ng Mataas na Lupa, Paco, Maynila.

Habang naaresto ang suspek na si Vincent Roxas, 33, driver, ng Trese Martirez, Cavite, sa loob ng garahe  ng truck ‘di kalayuan sa lugar.

Naganap ang insidente dakong 10:30 p.m. sa nabanggit na lugar nang umakyat ang biktima sa likurang bahagi ng truck habang nakahinto dahil naka-red ang signal ng traffic light.

Pinababa ng suspek ang biktima ngunit lumipat si Yabut sa unahang bahagi ng sasakyan at umakyat sa driver’s seat nang makita ang P3,000 sa dash board ng truck.

“Akina ‘yung pera ninyo, lasing ako, sabi niya, pinababa ko siya, pinaandar ko ‘yung truck kaya napilitan siyang tumalon tapos kumuha siya ng bato, binato niya ‘yung salamin ng truck, nabasag, bumaba ako at kinompronta ko siya,”  ayon sa suspek.

Humantong sa suntukan ang komprontasyon hanggang mahulog mula sa biktima ang patalim na agad dinampot ng suspek at inundayan ng saksak si Yabut.

Leonard Basilio