Sekyu patay, 1 pa sugatan sa holdap sa Agora market

BINAWIAN ng buhay ang isang security guard habang sugatan ang isang babaeng kolektor makaraan holdapin sa Agora Public Market sa San Juan kahapon.

Naganap ang insidente sa basement ng palengke dakong 9:30 a.m. habang nangongolekta ng pera sa mga tindahan si Rosalyn Lopez, 25, kasama ang escort at guwardyang si Florante Sepeda, 31-anyos. 

Ayon sa mga testigo, bigla na lamang nilapitan ng suspek ang mga biktima sabay deklara ng holdap at sila ay binaril.

Inagaw ng suspek ang bag na naglalaman ng hindi pa matukoy na halaga saka lumabas ng palengke at tumakas sakay ng motorsiklong minamaneho ng naghihintay na kasabwat.

Ayon kay Sr. Supt. Ariel Arcinas, hepe ng San Juan Police, dakong 10:30 a.m. nang idineklara ng mga doktor ng San Juan Medical Center na binawian ng buhay ang sekyu na nabaril ng kalibre .45 sa tiyan.

Habang nilalapatan ng lunas sa ospital ang kolektor na nabatid na tauhan ng Bellagio Holdings.