P.3-M equipments natangay ng kawatan sa 2 paaralan

LA UNION – Palaisipan sa mga awtoridad kung sino ang nasa likod ng pangnanakaw sa Corro-oy National High School sa Brgy. Corro-oy, bayan ng Santol, La Union, at sa Nalvo Norte Elementary School sa bayan ng Luna, ng nasabi ring lalawigan.

Una rito, aabot sa P280,000 halaga ng computer items na kinabibilangan ng 16 CPU (central processing units), 15 monitor at tatlong speaker ang tinangay mula sa computer room at principal’s office ng Corro-oy National High School.

Sa pagsisiyasat ng pulisya, sinira ng hindi nakikilalang mga salarin ang metal window grill at pitong jalousy ng nasabing silid na ginawa nilang entry at exit point.

Samantala, nilooban din ng hindi nakikilalang mga suspek ang H.E. room ng Nalvo Norte Elementary School sa bayan ng Luna, La Union.

Aabot sa P6,300 cash na nakalagay sa plastic container ang tinangay mula sa stock room.

Patuloy na sinisiyasat ng mga awtoridad kung may kaugnayan ang insidente ng pagnanakaw sa dalawang paaralan.