4 BIFF fighters patay sa militar

APAT pang miyembro ng Bangsamoro Islamic Freedom Fighters (BIFF) ang napatay sa magkasunod na opensiba ng Armed Forces of the Philippines (AFP) sa Shariff Saydona, Maguindanao simula nitong Sabado ng gabi.

Ayon kay Lt. Col Willy Manalang, Commanding Officer ng Marine Battalion Landing Team 8, dakong 10 p.m. nang makasagupa nila ang grupo ng teroristang si Basit Usman sa Pusao Village.

Linggo ng umaga, muling nakaharap ng tropa ng gobyerno ang BIFF, ilang kilometro mula sa naunang encounter site sa gitna ng kanilang pagtugis sa mga rebelde.

Isa sa apat na napatay na rebelde ang nakasuot ng uniporme ng PNP Special Action Force (SAF).

Naniniwala si Manalang na sangkot ang naturang BIFF fighters sa operasyong ikinamatay ng 44 SAF troopers sa Mamasapano, Maguindanao noong Enero 25.

Narekober din sa encounter site ang tatlong matataas na kalibre ng baril at isang mortar.