2 turista patay, 6 sugatan sa sumalpok na van

DAGUPAN CITY – Humantong sa trahedya ang masaya sanang pamamasyal ng mga turista mula sa Quezon City sa Hundred Islands National Park sa Alaminos City sa Pangasinan nang mamatay ang dalawa sa kanilang kasamahan makaraan sumalpok ang kanilang sinasakyang van sa bayan ng Mangatarem.

Ayon kay Chief Inspector Rex Infante, hepe ng Mangatarem Police Station, namatay sina Dennis Espejo at Angelita Montes habang sugatan sina Jovelyn Macatunggay, Vanessa G. Abus, Renato P. Abus, Philip Eric Ilagan, Dave Capistrano, pawang nasa hustong gulang, at RV Peter G. Abus, 4-anyos, mga residente ng Quezon City.

Sa imbestigasyon ng mga awtoridad, sinalpok ng van sakay ang mga biktima, ang likurang bahagi ng sinusundan nilang mini-bus galing sa Tarlac City patungo sa Dagupan City.

Sinasabing posibleng nakatulog ang driver ng van lulan ang mga pasahero, dulot nang mahabang biyahe.