Kasong criminal at administratibo vs pulis na nagpuslit kay Sen. Bong

INIREKOMENDA ng Criminal Investigation and Detection Group (CIDG) investigating team ang kasong administratibo at kriminal laban sa PNP officers na sangkot sa pagpuslit kay Sen. Bong Revilla Jr. para dumalo sa kaarawan ng kapwa senador na si Juan Ponce Enrile.

Batay sa lumabas na resulta ng imbestigasyon, na pirmado ni CIDG Chief, Dir. Benjamin Magalong, nagkaroon ng sabwatan ang duty officer na si Senior Insp. Cecilia Tapaoan at si Custodial OIC, Supt. Eulogio Lovello Fabro para payagang pumunta sa PNP General Hospital si Revilla habang nagdiriwang ng ika-91 kaarawan si Enrile.

Lumalabas din sa imbestigasyon na taliwas ang salaysay na sinumpaan ng security team ni Revilla na pinamumunuan ni Tampaoan, sa naging salaysay ni Raymond Santos na hepe ng emergency room ng PNP General Hospital.

Una nang idinipensa ni Sen. Revilla na may iniinda siyang sakit kaya nagpatulong siya sa mga pulis para dalhin sa ospital.

Kasunod nito ay lumabas din ang mga larawan ng senador kasama si Enrile sa isang mesa habang nagsasalo-salo.

Samantala, abswelto si Chief Supt. Alberto Supapo at ibang command group makaraan mapatunayang wala silang kinalaman sa nangyari, gayondin sina Chief Insp. Duds Raymond Santos, PO2 Mario Bello, PO2 Rico Padilla, PO2 Dennis Delos Santos at PO1 Joelito Olayvar.